बुटवलमा भोलि (बुधबार)देखि मदन भण्डारी गोल्ड कप इन्डो नेपाल रनिङ शिल्ड पुरुष भलिबल च्याम्पियनसिप हुने भएको छ ।

मदन भण्डारी स्पोर्ट्स एकेडेमीको आयोजनामा हुने प्रतियोगिताको बुधबार प्रधानमन्त्री केपी शर्मा ओलीले उद्‌घाटन गर्ने कार्यक्रम छ । 

मंगलबार एकेडेमीले पत्रकार सम्मेलन गरेर प्रतियोगिताको टर्फी अनावरण गर्दै प्रतियोगिताको तयारी पूरा भएको जानकारी दिएको हो ।

प्रतियोगितामा विभागीयसहित ८ टिमबीच प्रतिस्पर्धा हुने एकेडेमीका अध्यक्ष ध्रुव आचार्यले जानकारी दिए ।

प्रतियोगितामा आयोजक मदन भण्डारी स्पोर्ट्स एकेडमी, नेपाल आर्मी, सशस्त्र प्रहरी बल, नेपाल प्रहरी, गजरात स्टेट भलिबल एसोसियसन, मणिमुकुन्द भलिबल क्लब, गलकोट भलिबल क्लब र रुकुम पश्चिम भलिबल प्रशिक्षण केन्द्र सहभागी हुनेछन् ।

प्रतियोगिताको प्रथम हुने टिमले ७ लाख, द्वितीयले ३ लाख ५० हजार, तृतीयले १ लाख ७५ हजार र सान्त्वनाले १ लाख शिल्ड मेडल र प्रमाणपत्र पाउने अध्यक्ष आचार्यले जानकारी दिए ।

बुटवल–१० स्थित रामनगर खेलमैदानमा हुने प्रतियोगिता ८ दिनसम्म चल्नेछ ।

प्रतियोगिताको लागि पहिलो चरणमा टिकट शुल्क ३०० हुने र सेमिफाइनल र फाइनलमा बढाउँदै लैजाने आयोजनाले जनाएको छ ।

प्रतियोगिता सम्पन्न गर्न १ करोड १० लाख ६० हजार खर्च हुने आयोजकको अनुमान छ ।​

टर्फी अनावरण गर्दै नेकपा एमालेका पोलिटब्युरो सदस्य तथा लुम्बिनी प्रदेशका पूर्वमुख्यमन्त्री लीला गिरीले एकेडेमीले खेलकुद र पर्यटन क्षेत्रलाई जोड्दै अघि बढेको बताए ।

यसले दक्ष खेलाडी उत्पादन गर्नुका साथै लुम्बिनी क्षेत्रलाई खेलकुदको क्षेत्रमा अघि बढाउन सघाएको बताए ।

विक्रम संवत् २०६६ सालमा स्थापना भएको एकेडेमी दक्ष र व्यावसायिक खेलाडी उत्पादनमा जुटेको एकेडेमीले समय-समयमा विभिन्न प्रतियोगिता गर्दै आएको बताए ।

प्रतियोगितामा यस क्षेत्रका सांसद तथा अर्थमन्त्री विष्णु पौडेल पनि सहभागी हुनेछन् ।