धनन्जय कुमार उपाध्याय/रुपन्देही

रुपन्देहीको कोटाहीमाई गाउँपालिका–५ तुनियाहवामा दुई वटा यात्रुबाहक बस एकआपसमा ठोक्किँदा लगभग ५ जना सर्वसाधारण घाइते भएका छन्। लु १ ख ९४९३ नम्बरको बस थुम्हवाबाट भैरहवा जाँदै गरेको अवस्थामा करौता–भैरहवा रुटमा चलिरहेको अर्को यात्रुबाहक बससँग ठोक्किँदा दुर्घटना भएको हो। करौता तर्फबाट भैरहवा जाँदै गरेको बस अगाडि रहेको र कोटाहीमाई–५ तुनियाहवामा यात्रु बोक्नका लागि रोकिने क्रममा पछाडिबाट थुम्हवा तर्फको बसले ठक्कर दिएर दुर्घटना भएको इलाका प्रहरी कार्यालय मझगावाँ को प्रहरी निरीक्षक तपेन्द्र बिष्टले जानकारी दिए।

दुर्घटनामा घाइते भएका ५ जना सर्वसाधारणलाई तत्काल उद्धार गरी उपचारका लागि भैरहवास्थित सिटी अस्पताल पठाइएको बिष्टले बताए। घाइतेहरूको अवस्था सामान्य रहेको जनाइएको छ। दुर्घटनापछि केही समय सडकमा आवागमन प्रभावित भए पनि प्रहरीले सवारी साधन हटाई यातायात सहज बनाएको छ। घटनाबारे थप अनुसन्धान भइरहेको प्रहरीले जनाएको छ।